Ég hef ekki haft mikinn tíma til þess að blogga að undanförnu, ætla að reyna að bæta aðeins úr núna. Var önnum kafin við að undirbúa skírnina hennar Heklu Sifjar sem var núna á sunnudaginn. Þetta tókst alltsaman mjög vel. Athöfnin var í Friðrikskapellu og sr. Vigfús Þór Árnason skírði. Okkur þótti gaman að fá hann til þess að skíra dömuna vegna þess að hann skírði mig og einnig Kötlu Dögg. Svo er hann líka bara sérlega almennilegur og skemmtilegur prestur. Sem dæmi um það þá var Hekla nú ekkert alltof sátt á meðan á athöfninni stóð (ég segi í gríni að hún eigi örugglega eftir að segja sig úr þjóðkirkjunni við fyrsta tækifæri, svo ósátt var hún) en hann var ekkert að stressa sig á hlutunum þó svo að hann ætti að vera mættur annarsstaðar strax á eftir okkar athöfn. Það kom líka í ljós að hann er mikill valsari sem spillti nú ekki fyrir:) Veislan var svo hérna heima strax á eftir og tókst mjög vel. Alltaf gaman og notalegt þegar fjölskyldan kemur saman. Veitingarnar voru líka mjög vel heppnaðar fannst mér. Við fengum líka ómetanlega hjálp við undirbúninginn frá mömmu og pabba. Daman fékk svo margar fallegar gjafir, takk kærlega fyrir okkur:) Núna þegar einni athöfn er lokið þá er ég farin að hugsa um þá næstu, en við skötuhjúin erum að hugsa um að gifta okkur næsta sumar. Erum ekki alveg búin að ákveða stað og stund en stefnan er sett á júlí eða ágúst. Ég er alveg á kafi í því að skoða kjóla núna. Er búin að ákveða að kjóllinn á að vera í keltneskum eða miðaldastíl eða einhverstaðar mitt á milli:) Ég er alveg veik fyrir kjólum í þessum stíl og er búin að vera að skoða á netinu. Er reyndar búin að finna draumakjólinn en hann kostar 1200 pund sem mér reiknast til að séu um það bil 130.000 kr. , sem er "aðeins" meira en það sem ég hafði hugsað mér að eyða í kjólinn. Ég er samt farin að hallast að því að kaupa frekar kjól heldur en að leigja. Ég hef nefnilega heyrt að það kosti á bilinu 20-40 þúsund að leigja kjól, en það er hægt að kaupa og jafnvel sérsaumaðan á netinu fyrir sama pening. En ég á eftir að skoða þetta alltsaman betur. Í þessari leit minni á netinu rakst ég m.a. á myndir af brúðhjónum sem giftu sig við Stonehenge, ég hefði nú ekkert á móti því, þetta var líka alveg hrikalega flott hjá þeim, brúðhjónin voru einmitt klædd í keltneskum stíl, bæði í skikkjum og bara mjög flott allt saman. Ég veit samt að Sæbi myndi ekki samþykkja svona brúðkaup:) En það verður bara að fara milliveginn og samningaleiðina. En það er nægur tími til stefnu ennþá og mjög gaman að spá í hvernig við viljum hafa þetta. Aðrar fréttir af okkur eru þær að Kötlu gengur mjög vel í körfuboltanum. Það er svo gaman að fylgjast með því hvað henni hefur farið fram. Hún er 2-3 árum yngri en hinar stelpurnar og var því getulega séð frekar mikið á eftir, enda þær allar búnar að æfa lengur en hún. Hún hitti t.d. ekki í körfurnar og var yfirleitt frekar langt frá því, náði ekki að kasta nógu hátt. En svo var eins og það kviknaði ljós hjá henni á einni æfingunni og allt í einu fór hún að ná þessu, er núna alveg farin að hitta og er að bæta sig mjög mikið. Það besta er hvað hún hefur gaman af þessu. Hún er mjög spennt núna því að næsta þriðjudag verður þemaæfing hjá þeim þar sem þær eiga allar að mæta með hatt og svo verður pizzapartý á eftir. Verður örugglega gaman hjá þeim.