Ég fór með Heklu í skoðun á föstudaginn, að þessu sinni mætti ég á réttum tíma:) Það gekk vel, hún er orðin 6.325 gr. og 59 cm. heldur alveg sinni kúrfu. Svo fékk hún sína fyrstu sprautu, óhætt að segja að hún hafi ekki verið ánægð með það, en hún var nú reyndar fljót að jafna sig. Katla er öll að hressast, hún fékk að fara til vinkonu sinnar í dag og gistir þar í nótt. Hún er búin að hlakka til í örugglega 2 vikur, eða alveg síðan þetta var ákveðið, þannig að það varð nú að leyfa henni að fara þrátt fyrir veikindin. Hún er líka nánast orðin hress, laus við hitann og hóstar miklu minna. Ég skutlaði henni þangað um fjögurleytið og svo fórum við Hekla í Smáralind. Ætlunin var að kaupa nokkrar jólagjafir, ég keypti nú reyndar ekki nema eina en það er þó betra en ekkert. Keypti mér líka sæta eyrnalokka og svo fann ég Mr. Bean á dvd í Tiger á 400 kr. gat nú ekki sleppt því, ætla að horfa á hann á eftir ef Hekla verður samvinnuþýð:) Það var annars alveg fullt af fólki í Smáralindinni, greinilegt að jólaösin er byrjuð. Hekla var bara hin kátasta með þetta, fannst greinilega ekkert leiðinlegt að fara í smá verslunarleiðangur. Við kíktum svo aðeins á Dagný vinkonu áður en við fórum heim, er búin að vera á leiðinni til hennar svo lengi að ég mátti til með að láta verða af því núna. Alltaf gaman að hitta hana. Nýjasti LOST þátturinn bíður svo sjóðheitur í tölvunni, en ég er svoddan hæna að ég þori ekki að horfa á hann fyrr en Sæbi kemur heim, síðasti þáttur var mjög svo spooky! En ég er farin að horfa á Bean:)

Ja hérna, þessi dagur stefnir í að verða "one of those days"....ég var alveg 100% viss um að ég ætti að mæta með Heklu Sif í þriggja mánaða skoðun í dag, veit ekki af hverju ég var svona hrikalega föst á þessari dagsetningu 15. nóvember, en allavega reif mig á fætur í morgun, Sæbi fékk að mæta seinna í vinnuna af því að Katla er lasin. Vakti skonsuna af værum blundi og dúðaði okkur út í kuldann, var á síðustu stundu eins og alltaf en náði þó á heilsugæsluna á réttum tíma. Hitti þar einhverja hjúkku sem kannaðist bara ekkert við að eiga von á okkur. Ég hélt það nú, við ættum sko aldeilis pantaðan tíma, var að byrja að setja mig í smá pirringsstellingar á meðan hún fór fram til þess að tékka á þessu í tölvunni. Datt þá í hug að kíkja á minnistatriðin í símanum mínum og þar blasti þetta við tími 18. nóvember! Ekkert annað að gera en að setja upp vandræðalegt bros...ehhh....þetta er víst ekki fyrr en á föstudaginn...og koma sér út. Var sem betur fer ekki búin að klæða Heklu úr, henni finnst nú nógu leiðinlegt að láta klæða sig í og úr þó að það sé ekki verið að því að óþörfu. En fyrst ég var nú komin út þá dreif ég mig í Nettó og verslaði smá. Svo þegar ég ætlaði að skella pokunum í bílinn þá tók ekki betra við, læsingarnar frosnar fastar, þannig að það tók smá tíma að reyna að juða lyklinum í og opna, en tókst sem betur fer á endanum. Svo er bara að reyna að gera það besta úr deginum. Katla Dögg er frekar súr yfir því að þurfa að hanga heima og ég skil hana vel, ekkert gaman að hangsa með mömmu og litlu systur og svo missir hún af körfuboltaæfingu í dag í þokkabót. Svo á morgun er afmælishátíð í leikskólanum, Fálkaborg er 25 ára á morgun. Ég vona að hún verði orðin hress og geti mætt á morgun.

Take the Which Neighbour Are You? Quiz, hosted by Neighbours: The Perfect Blend.


Hmmm....já, ég er víst Harold Bishop...verð bara að taka því, var allavega fegin að vera einhver sem ég kannast við úr þáttunum, hef svo lítið fylgst með þessum þáttum að undanförnu.